ආර්ථීකය සරලව
ණය ප්‍රතිව්‍යුහගත කිරීම සම්බන්ධයෙන් ශ්‍රී ලංකාව චීනයේ එක්සිම් බැංකුව සමග ඇති කරගත් එකඟතාවය පිළිබඳව පැරිස් සමාජය ඇතුළු අනෙකුත් ණය හිමියන් දැනුවත් කළ බව මහ බැංකු අධිපති ආචාර්ය නන්දලාල් වීරසිංහ මහතා ප්‍රකාශ කොට ඇත.
එම ණය හිමියන් චීනයේ ණය ප්‍රතිව්‍යුහගත කිරීම අධ්‍යයනය කොට තීරණයකට එලබෙනු ඇතැයි කියති.
ලබන වසරේ ශ්‍රී ලංකාවේ ආර්ථිකයේ සියයට 3.3 ක වර්ධනයක් සිදුවනු ඇතැයි යන්න තම පුරෝකථනය බව ලෝක ප්‍රකට ශ්‍රේණිගත කිරීමේ ආයතනයක් වන ෆිච්ට් රේටින්ග් ආයතනය කියයි .
අයවැය ඉදිරිපත් කිරීමෙන් පසු එම ආයතනය නිකුත් කළ වාර්තාවේ එය මෙලෙස සටහන් කර ඇත.
ග්‍රෆින් සඳහා ලෝකයේ ඇති සමස්ත වෙළෙඳපොළ ඩොලර් මිලියන 200 ක් බවත්, ග්‍රෆින් හදන සමාගම් ඒ සඳහා ශ්‍රී ලංකාවේ මිනිරන් ලබා නොගන්නා බවත්, තමන් කළ අධ්‍යයනයකින් හෙළි වූ බව ප්‍රකට ව්‍යාපාරික සහ පාර්ලිමේන්තු මන්ත්‍රී ධම්මික පෙරේරා මහතා ප්‍රකාශ කරයි.
විදේශීය සමගාමක් සතු , ශ්‍රී ලංකාවේ ප්‍රධාන මිනිරන් නිෂ්පාදන සමාගමක් මිල දී ගැනීමේ යෝජනාවක් ඉදිරිපත් වූ අවස්ථාවේ තමා කළ අධ්‍යයනයකින් මෙම තොරතුරු හෙළි වූ බව ඒ මහතා කියයි.
2032 වන විට මෙරටට අඛණ්ඩ විදුලි බල සැපයුමක් සඳහා පාවෙන න්‍යෂ්ටික බලාගාරයක් ඉදිකිරීමට සැලසුම් සකස් කරමින් සිටින බව ශ්‍රී ලංකා පරමාණු බලශක්ති මණ්ඩලයේ සභාපති මහාචාර්ය එස්. ආර්. ඩී. රෝසා මහතා පවසයි.
ඔහු මේ බව සඳහන් කළේ මෙරට න්‍යෂ්ටික බලශක්ති නීතිය සකස් කිරීම සඳහා දිවයිනට පැමිණ සිටින ජාත්‍යන්තර පරමාණුක බලශක්ති ආයතනයේ නිලධාරීන් පිරිසක් සමග පැවැති සාකච්ඡාවකින් අනතුරුව ය.
