ආර්ථීකය සරලව
ස්වභාවික වායු (LNG) පාවෙන වෙළෙඳ ගබඩාවක් හම්බන්තොට වරාය ආශ්‍රිතව ඉදි කිරීමේ ගිවිසුමකට අත්සන් තැබූ බව ලංකා ආයෝජන මණ්ඩලය නිවේදනය කරයි.
ඇමෙරිකානු ඩොලර් මිලියන 97.2 ක වියදමින් මෙම ආයෝජනය කිරීමට ඉදිරිපත් වී ඇත්තේ පර්ල් එනර්ජි නම් සමාගමකි . එයට අවශ්‍ය ආයෝජනය සවුදි අරාබියේ ඕමාර් සිරාජ් නමැති ව්‍යාපාරිකයා විසින් සිදුකරනු ලබන බව පර්ල් එනර්ජි සමගම කියයි.
මුල්‍ය ආයතන සම්බන්ධයෙන් පාරිභෝගිකයන්ගේ පැමිණිලි භාර ගැනීම සහ විභාගන්කිරීම සඳහා වෙනම දෙපාර්තමේන්තුවක් ස්ථාපිත කිරීමට ශ්‍රී ලංකා මහ බැංකුව කටයුතු කොට ඇත. මුල්‍ය ආයතනවල යත ක්‍රියා සහ පාරිභෝගිකයන්ට වන හිරිහැර පිලිබඳ පැමිණිලි ලබාගැනීම හා විභාග කිරීම මෙම අංශයෙන් සිදුවෙයි.
මුල්‍ය පාරිභෝගික සම්බන්ධතා දෙපාර්තමේන්තුව ලෙස හඳුන් වන මෙමගින් ශ්‍රී ලංකා මහ බැංකුව විසින් අධීක්ෂණය කරනු ලබන මුල්‍ය ආයතන ගැන ලැබෙන පැමිණිලි විභාග කිරීම පමණක් මුල දී සිදුවනු ඇතැයි මහ බැංකුව කියයි . මුල්‍ය ආයතන නියාමනය හා පාරිභෝගිකයන් දැනුවත් කිරීම ආදී කටයුතු සඳහා මෙම අංශය පසුව තම කටයුතු පුළුල් කරනු ඇත. වෙළෙඳපොළ ක්‍රියාකාරීත්වය, භාරිභෝගිකයන් බලසතුකිරීම , සහ මුල්‍ය පාරිභෝගික අධ්‍යාපනය ද මෙමගින් සිදු කිරීමට බලාපොරොත්තු වෙයි.
මෙම වසරේ ශ්‍රි ලංකාවේ අපේක්ෂිත ආර්ථික වර්ධනය බින්දුවක් වනු ඇති බව ශ්‍රී ලංකා මහා බැංකුව කියයි.
වසරේ මුල් කාර්තුවේ ආර්ථික වර්ධනය අනපේක්ෂිත ලෙස සියයට ඍන 1,6ක් වී ඇතත් අවසන් කාර්තුව වන විට ආර්ථිකයේ ඉහල වර්ධනයක් සිදුවනු ඇතැයි මහ බැංකු අධිපති ඩබ්ලිව් ඩී ලක්ෂ්මන් මහතා කියයි.
රටේ කළු සල්ලි ජාවාරම මැඩ පැවැත්වීමට පනවා ඇති මුදල් ගනුදෙනු වාර්තාකිරීමේ නීතිය උල්ලංඝනය කිරීම ගැන මෙරට බැංකු හා මුල්‍ය ආයතන කිහිපයකින් දඩ මුදල් අයකර ගැනීමට මහා බැංකුවේ මුල්‍ය බුද්ධි ඒකකය කටයුතු කොට ඇත.
මුදල් විශුද්ධිකර්ණයට එරෙහිව සහ ත්‍රස්තවාදී සංවිධානවලට මුදල් ලබාදීම වැලකීමට පිහිටුවා ඇති මුල්‍ය බුද්ධි ඒකකය 2019 වසරේ දී මිලියන පහක් ද 2020 වසරේ මේ වනවිට මිලියනයක මුදලක් ද දඩ වශයෙන් අය කරගෙන ඇත.
ශ්‍රී ලංකාවට ඩොලර් මිලියන 400ක ණය මුදලක් ලබා දීමට ඉන්දියාව එකඟත්වය පලකොට ඇති බව ශ්‍රී ලංකාවේ ඉන්දීය මහ කොමසාරිස් කාර්යාලය ප්‍රකාශ කොට ඇත.
මෙම ණය මුදල ලබා දෙන්නේ ඉන්දියාවේ රිසර්ව් බැංකුවෙනි .
ශ්‍රී ලංකාව පසුගිය දා ඉල්ලා සිටි ඩොලර් මිලියන 500 ක ඩොලර් ණය මුදල ලබාදීමට චීනයේ සහ ඉන්දියාවේ රාජ්‍ය බැංකු යෝජනා ඉදිරිපත් කොට ඇති බව වාර්තා වෙයි .
චීනයේ කාර්මික සහ වාණිජ බැංකුව සහ ඉන්දියානු රාජ්‍ය බැංකුව මේ සඳහා ඉදිරිප වී ඇත.
MCC ලෙස හඳුන්වනු ලබන සහශ්‍රක සහයෝගිතා සමායතන වැඩ සටහන යටතේ ආධාර ලබාගැනීමට 2006 වසරේ දී ඇමෙරිකානු ආණ්ඩුව හා මහින්ද රාජපක්ෂ ආණ්ඩුව අතර සාකච්ඡා පැවති බවට පලවන වාර්තා සත්‍ය වුව ද එදා කතා කළේ යහපාලන ආණ්ඩුව සකස්කර ඇති වත්මන් ආකාරයේ ගිවිසුමක් ගැන නොවන බව මහ බැංකුවේ හිටපු අධිපති අජිත් නිවාඩ් කබ්රාල් මහතා නිවේදනයක් නිකුත් කරමින් කියයි .
රටට අහිතකර කොන්දේසි යටතේ වන ගිවිසුමකට එම රජය කිසිසේත් එකඟ නොවනු ඇති බව ද එම නිවේදනයේ සදහන් වෙයි
රජයට අයත් ශ්‍රී ලංකා රක්ෂණ සමාගම පසුගිය 2019 වසරේ දී රුපියල් කොටි 820ක ලාභයක් ලබා ඇති බව වාර්තා වෙයි .
මෙය රුපියල් කොටි 710ක් ලාභ ලබමින් ශ්‍රී ලංකා රක්ෂණ සමාගම 2018 වසරේ තබා තිබු වාර්තාව ද තම සමාගම විසින් ම බිඳ හෙලීම කි.
ඉන්දියාවෙන් ලැබෙන ඩොලර් මිලියන 191 ක ආධාර මත ඉදිවන ප්‍රධාන ව්‍යාපෘති දෙකක් කඩිනම් කිරීම සඳහා කැබිනට් අනුමැතිය හිමි වී ඇත.
මහව සිට ඕමන්ත දක්වා දුම්රිය මාර්ගය නවීකරණය සඳහා වන ඩොලර් මිලියන 91 ක ව්‍යාපෘතිය සහ ග්‍රාමීය පළාත්වල රජයේ ආයතන සහ අඩු ආදායම් ලාබී නිවාස සඳහා සුර්ය බල විදුලිය ලබාදීම සඳහා වන ඩොලර් මිලියන 100 ක ව්‍යාපෘතියට අවශ්‍ය පහසුකම් සැපයීමට කැබිනට් මණ්ඩලය පසුගිය 10 දා තීරණය කළේ ය.
මෙරට තාප (ඉන්ධන හා ගල් අගුරු) විදුලිබලාගාර වලින් විදුලිය ජනනයේදී සිදුවන සමාජමය හා පාරිසරික බලපෑම් හේතුවෙන් සමස්ත ආර්ථිකයට දැරීමට සිදුවන අමතර පිරිවැය හෙවත් බාහිර පිරිවැය සකස් කිරීම සදහා ශ්‍රී ලංකාවේ තාප බලාගාරව බාහිර පිරිවැය පිළිබද අධ්‍යයනයක් ශ්‍රී ලංකා මහජන උපයෝගිතා කොමිෂන් සභාව සිදුකර ඇත. එම අධ්‍යනය මගින් මෙරට ගල් අගුරු හා ඩීසල් බලාගාරවලින් ප්‍රජාවට, සමාජයට හා පරිසරයට සිදුවන අහිතකර බලපෑමේ ආර්ථිකමය හානිය ඇස්තමේන්තු කර ඇත.
මෙම අධ්‍යයනය සදහා ශ්‍රී ලංකාවේ දැනට ක්‍රියාත්මක තාප බලාගාර වර්ග 4ක් පාදක කර ගෙන ඇත. නොරොච්චෝලේ බලාගාරය, යුගදනවි බලාගාරය, කැළණිතිස්ස බලාගාරය හා සපුගස්කන්ද බලාගාරය එම බලාගාර වේ.
